1Ti 5 | MED | STEP | Wu ronduⱡ mbᵾ, ik mura ngui ngᵾngi, wote wu mbᵾ tᵾkᵾn, nim nga tipanᵾm mel rundi. Kang wu mbᵾ tᵾkᵾn, nim nga ᵾngᵾnᵾl mel randkᵾn. Wote, amp manᵾmᵾl tᵾkᵾn, nim nga manᵾmᵾl mel rundi. Amp wendᵾp kᵾⱡ, numan kun kai ila, nim nga amp kimᵾnᵾl mel rundi.

1 Timothy 5

Mondpa Pili Wamp Tᵾkᵾn Rupᵾndᵾn Ei Mel

1 Wu ronduⱡ mbᵾ, ik mura ngui ngᵾngi, wote wu mbᵾ tᵾkᵾn, nim nga tipanᵾm mel rundi. Kang wu mbᵾ tᵾkᵾn, nim nga ᵾngᵾnᵾl mel randkᵾn. Wote, amp manᵾmᵾl tᵾkᵾn, nim nga manᵾmᵾl mel rundi. Amp wendᵾp kᵾⱡ, numan kun kai ila, nim nga amp kimᵾnᵾl mel rundi. 3 Amp wiya mendpᵾⱡ kᵾⱡ, kandkᵾn tᵾkᵾn ou ndui. 4 Amp wiya ti, elim nga kangambuⱡa na mat kep, wote elim nga kangambuⱡa apᵾmᵾl na mat, tepa moⱡum ndam, kangambuⱡa kᵾⱡ ou etᵾk, wote elim nokundᵾk kai iteing, wote punt mat morum nda ngok. Uⱡ i etmin ni, wu Got kandpa kai pᵾtᵾm. 5 Amp wiya munduⱡina ti, elim mendpᵾⱡ morum ei, elim nga numan ei, Got kᵾn tepa omba, rumbuldi rᵾnggilmᵾ raⱡ rᵾk rᵾk, Got kᵾn atinga ropa, elim tᵾpa rᵾpᵾndangga nᵾtᵾm. 6 Wote, amp wiya ti, elim mᵾi kona uⱡ mbᵾ nga ambuⱡpa paⱡpa andrᵾm ni, min orunga korum. 7 Amp kᵾⱡ, ya man ik kᵾⱡ nᵾk ngana, wote wamp mbᵾ ndi kandᵾk, ⱡawa mundi nᵾmᵾndeing. 8 Wamp ti, elim nga wamp mema kan ti, rᵾp etpa kai iti natᵾm ndam, wamp ei nga mondpa pili ti mon. Ei wamp ekit orunga iti natᵾtmᵾn ei mel etᵾm. 9 Amp wiya nga mbi rok, mana nduin rᵾⱡaip ila, amp ya i etpa, mat nga mint rok mana ndui. Amp ei, pana 60 ndi oⱡa ndupa, wu tenda ti mint purum. Uⱡ kai mat mint etpa, elim nga kangambuⱡa mbᵾ, rᵾp etpa kai mondrum. Omba wamp tᵾma ong mbᵾ, rawe etpa tᵾpa, kongun etpa wamp mbᵾ, tᵾpa rapundupa, Got nga kongun wu mbᵾ, kᵾmp ⱡumᵾi rondpa, wote wamp mong tᵾk mormin mbᵾ, tᵾpa rapundpa etᵾm amp ei nga mbi rui!

11 Wote, kang amp ti, wiya moⱡum ndam, mbi rok mana ndui nᵾndi! Amp ei, elim wu kont nga puⱡmba nimba pilim ei ndi, Kraist tᵾpa mbuⱡ ngumba, Nuim pep ruimp nimba, nimba mᵾi rormᵾn ik ni, wak romba uⱡ ei ndi, ⱡawa mba. 13 Uⱡ ti, wamp kᵾⱡ enimp mondᵾk, wote wamp manga mbila ᵾlinga rok, enimp mendpᵾⱡ mondᵾk, uⱡ ti, ik kunt rok, ik na mat nandilina mbᵾ, nᵾk etmin. 14 Wote, ei nga na pᵾnt ei, kang amp wiya kᵾⱡ wu puk, kangambuⱡa mek, wote enim nga mang kona kongun mbᵾ etᵾk, i eng uⱡ ei ndi, wu kit ei ndi, ropa mana ti natᵾmba. 15 Kang amp wiya mat, Jisas wak rok, Seitan pep rormin. 16 Na ndi, enim kundᵾp namp, mondpa pili amp ti nga rᵾⱡaip ila, amp wiya mat moⱡᵾng ndam, mondpa pili amp ei ndi, rᵾp etangga. Got nga rapa tenda ila wamp kᵾⱡ ndi, iteing nimba, wak rui nᵾrangga! Wote, Got nga rapa tenda ila wamp mbᵾ ndi, i ku etᵾk, ku moni wak rok, amp wiya mat, en enim kou moⱡᵾng mbᵾ tᵾk rᵾpᵾndeing.

17 Rup wu kᵾⱡ kandᵾk, tᵾk ou nduk, rᵾp minal iting ei, wu kat ronduⱡ mundᵾk, Got nga rᵾnang ik nᵾk nguk, wote wamp ik mbo endᵾk etmin wu kᵾⱡ ngᵾi! 18 Wote, Got nga Buk Wingti ei ndi, nimba mel,

“Nim ndi, kng kau ti, wit mong kambilpa nim nim ndum ei kᵾn, keta komnga ngui ngᵾngi!”
Wote ei nga,

“Rup wu ei, elim nga kongun etᵾm uⱡ ila, mel kai mat tᵾmba mint.” nᵾtᵾm.
19 Wamp nam ti ndi, rup wu ei, uⱡ ⱡawa ti, em nᵾm ndam, kum ti nᵾti mon! Wamp raⱡ kep, raldika kep, nᵾng ndam, mint kum ti! 20 Uⱡ ⱡawa em rᵾp wamp ei, wamp moⱡᵾng kona mbila ik mura ngana, wamp mbᵾ ndi kandᵾk, mundmong iteing.

21 Got kᵾn, Kraist Jisas kᵾn, wote anggelo eng nui kᵾⱡ nga kuimp ila moⱡᵾp nim kᵾn kun kondᵾp nᵾnt, ya ik kᵾⱡ, kum tekᵾn pep rui! Wote, nim nga uⱡ en mbila, wamp ti numan ngukᵾn, wamp ti numan ngui nganggᵾkᵾn uⱡ ti, iti nᵾti!

22 Got nga kongun ila wamp ti, tᵾkᵾrkᵾn mbi rokᵾn, tᵾkᵾn mundi nᵾmᵾndi! Wamp ti nga ⱡawa em ei, nim kᵾn kunda, mbi kit moⱡmba ei mon! Nim nga orunga eng nomba, kai itangga muⱡi!

23 Mbo nu mendpᵾⱡ nui nᵾni! Nu wain kot pendkᵾn nana, nim nga oⱡ ila kui petᵾm mbᵾ pora nangga! 24 Wamp mat nga uⱡ kit etmin mbᵾ, wei wei etᵾk kandurmin! Wote, wamp mat nga uⱡ kit etmin mbᵾ, kᵾni nakᵾndᵾrmᵾn mbᵾ, Got nga wamp kᵾmp tᵾmba uⱡ ila, unt kuimp tepa purum. Wote, wamp mat nga uⱡ kit etmin mbᵾ, akil tepᵾn kandurmᵾn. Ni mel ku, uⱡ kai mbᵾ, wei wei etᵾp kandurmᵾn. Wote uⱡ kai mat mo ropa petᵾm mbᵾ, wei wei etᵾp, kᵾni nakᵾndᵾrmᵾn. Uⱡ kai mbᵾ, mo rui narᵾmba.